माणिकचंद नारायण काबरे विद्यालयात सायबर सुरक्षिततेबाबत जनजागृती

सोनवद : डिजिटल युगात वाढत्या सायबर गुन्ह्यांच्या पार्श्वभूमीवर विद्यार्थ्यांमध्ये सायबर सुरक्षिततेबाबत जनजागृती निर्माण करण्याच्या उद्देशाने कवयित्री बहिणाबाई चौधरी उत्तर महाराष्ट्र विद्यापीठ, जळगाव आणि क्विक हील फाउंडेशन यांच्या संयुक्त विद्यमाने ६ ऑगस्ट २०२६ रोजी सोनवद येथील माणिकचंद नारायण काबरे विद्यालयात सायबर जनजागृती कार्यक्रमाचे आयोजन करण्यात आले.

या कार्यक्रमात विद्यार्थ्यांना इंटरनेटचा सुरक्षित वापर, ऑनलाइन फसवणुकीपासून बचाव तसेच डिजिटल माध्यमांचा जबाबदारीने वापर करण्याबाबत मार्गदर्शन करण्यात आले. स्नेहल पाटील व वैष्णवी पाटील यांनी विद्यार्थ्यांशी संवाद साधत सायबर गुन्ह्यांचे प्रकार आणि त्यापासून बचाव करण्यासाठी आवश्यक खबरदारी याबाबत सविस्तर माहिती दिली.

यावेळी ओटीपी फ्रॉड, क्यूआर कोड फसवणूक, ऑनलाइन बँकिंग फ्रॉड, एआय व्हॉइस कॉल फ्रॉड, सोशल मीडिया फसवणूक, बनावट लिंक, फिशिंग, मजबूत पासवर्ड आणि टू-फॅक्टर ऑथेंटिकेशन (2FA) याबाबत विद्यार्थ्यांना सोप्या उदाहरणांसह माहिती देण्यात आली.

अनोळखी व्यक्तींना ओटीपी, बँक खात्याची माहिती किंवा वैयक्तिक माहिती देऊ नये, संशयास्पद लिंकवर क्लिक करू नये तसेच कोणतेही अॅप डाउनलोड करण्यापूर्वी त्याची खातरजमा करावी, असे आवाहन करण्यात आले. सोशल मीडियाचा वापर करताना गोपनीयता जपणे आणि सायबर फसवणूक झाल्यास तातडीने संबंधित यंत्रणेकडे तक्रार करणे आवश्यक असल्याचेही सांगण्यात आले.

कार्यक्रमादरम्यान प्रश्नोत्तरांच्या माध्यमातून विद्यार्थ्यांशी संवाद साधण्यात आला. विद्यार्थ्यांनी उत्स्फूर्त सहभाग नोंदवत सायबर सुरक्षिततेशी संबंधित विविध प्रश्न विचारले. मोबाईल आणि इंटरनेटचा दैनंदिन जीवनात सुरक्षित वापर कसा करावा, याचेही प्रत्यक्ष उदाहरणांद्वारे मार्गदर्शन करण्यात आले.

कार्यक्रमास विद्यालयाच्या मुख्याध्यापकांसह शिक्षकवृंद व विद्यार्थी मोठ्या संख्येने उपस्थित होते. मुख्याध्यापकांनी या उपक्रमाचे कौतुक करत विद्यार्थ्यांनी डिजिटल तंत्रज्ञानाचा सकारात्मक वापर करावा आणि ऑनलाइन व्यवहार करताना सदैव सतर्क राहावे, असे आवाहन केले.

या जनजागृती उपक्रमामुळे विद्यार्थ्यांमध्ये सायबर सुरक्षिततेबाबत जागरूकता वाढण्यास मदत झाली असून, सुरक्षित डिजिटल समाज घडविण्यास या उपक्रमाचा निश्चितच हातभार लागणार आहे.