शेतातून ९ हजार रुपयांची केबल वायर चोरी शिंदखेडा पोलिसांत गुन्हा दाखल
शिंदखेडा प्रतिनिधी : शिंदखेडा तालुक्यातील चिरणे रोड परिसरातील एका शेतातून अज्ञात चोरट्याने ८० मीटर केबल वायर चोरी केल्याची घटना समोर आली आहे. या प्रकरणी शिंदखेडा पोलीस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, विजयसिंग नथेसिंग राजपूत (वय ७४) यांचे चिरणे रोडवरील गट क्रमांक १८६ मध्ये शेत आहे. ३ जून रोजी सकाळी सुमारे ९ वाजेच्या दरम्यान अज्ञात चोरट्याने शेतातील ४० मीटर केबल वायर चोरी केली. त्यानंतर पुन्हा त्याच दिवशी आणखी ४० मीटर केबल वायर चोरून नेण्यात आली. या दोन्ही घटनांमध्ये प्रत्येकी ४ हजार ५०० रुपये किंमतीची केबल वायर चोरीस गेली असून, एकूण ९ हजार रुपये किंमतीची ८० मीटर केबल वायर लंपास करण्यात आली आहे. याप्रकरणी विजयसिंग राजपूत यांच्या फिर्यादीवरून शिंदखेडा पोलीस ठाण्यात अज्ञात चोरट्याविरुद्ध चोरीचा गुन्हा दाखल करण्यात आला असून, पुढील तपास सुरू आहे.
