सुप्रीम कंपनी आणि 'यहा मोगी' संस्थेचा स्तुत्य सामाजिक उपक्रम महिला व विद्यार्थ्यांना जीवनावश्यक वस्तूंचे वाटप

नंदुरबार  (विशेष प्रतिनिधी): 

जळगाव येथील नामवंत सुप्रीम कंपनी आणि यहा मोगी संस्था धडगाव यांच्या संयुक्त विद्यमाने नंदुरबार तालुक्यातील अंबापूर गावात नुकताच एक भव्य सामाजिक कार्यक्रम पार पडला. या उपक्रमांतर्गत गावातील गरजू विधवा महिलांना आणि विद्यार्थ्यांना जीवनावश्यक वस्तूंचे वाटप करण्यात आले. तसेच त्यांना विविध विषयांवर मार्गदर्शन देखील  करण्यात आले. माजी बाल कल्याण समिती अध्यक्ष व  याहा  मोगी संस्थेचे संस्थापक अध्यक्ष श्री. विठ्ठल कदम यांच्या संकल्पनेतून हा मानवतावादी उपक्रम राबवण्यात आला. थंडीच्या दिवसांची गरज ओळखून आणि सामाजिक बांधिलकी जोपासत हे मदत कार्य करण्यात आले ज्याला सुप्रीम कंपनी जळगाव यांचे सहाय्य मिळाले.

महिला आणि बालकांसाठी मदतीचा हात : 

या कार्यक्रमात विधवा महिलांना गरम चादर, साडी, चप्पल आणि टिफिन डबे यांसारख्या दैनंदिन गरजेच्या वस्तूंची भेट देण्यात आली. विद्यार्थ्यांच्या शैक्षणिक प्रगतीला हातभार लावण्यासाठी त्यांना स्टेशनरी, स्कूल बॅग आणि टिफिन देण्यात आले, तर लहान बालकांना थंडीपासून संरक्षणासाठी गरम कपडे आणि स्वेटर वाटप करण्यात आले.

कायदे आणि सुरक्षिततेविषयी जनजागृती:

वस्तू वाटपाच्या जोडीलाच उपस्थित मान्यवरांनी ग्रामस्थांना मोलाचे मार्गदर्शन केले. बाल संरक्षण अधिकारी श्री. गौतम वाघ यांनी बालकांचे हक्क, संरक्षणासंदर्भातील कायदे तसेच मुलांसाठी विविध क्षेत्रांत उपलब्ध असलेल्या शासकीय योजनांची सविस्तर माहिती दिली. तसेच, चाईल्डलाईन समन्वयक श्रीमती सपना नगराळे यांनी मुलांच्या सुरक्षिततेविषयी संवाद साधला. त्यांनी बालकांसाठी कार्यरत असलेल्या १०९८ 'चाईल्ड हेल्पलाइन' क्रमांकाची माहिती देऊन संकटाच्या वेळी त्याचा वापर कसा करावा, याबद्दल मार्गदर्शन केले.

भविष्यातील विकासाचा ध्यास – सुरेश मंत्री:

सुप्रीम कंपनीचे असोसिएट व्हॉइस प्रेसिडेंट (फायनान्स अँड अकाउंट) श्री. सुरेश मंत्री यांनी यावेळी महिला आणि विद्यार्थ्यांना संबोधित केले. ते म्हणाले, "आम्ही केवळ वस्तू वाटप करून थांबणार नाही, तर येणाऱ्या काळात महिलांना स्वावलंबी करण्यासाठी छोटे-छोटे लघुउद्योग सुरू करण्यास मदत करणार आहोत. तसेच विद्यार्थ्यांचा सर्वांगीण विकास व्हावा, यासाठी अनेक नाविन्यपूर्ण संकल्पना राबवण्यासाठी आम्ही कटिबद्ध आहोत." 

उत्स्फूर्त प्रतिसाद आणि आभार:

या कार्यक्रमास गावातील अंगणवाडी सेविका, स्थानिक नागरिक तसेच पंचक्रोशीतील अनेक मान्यवर मोठ्या संख्येने उपस्थित होते. कार्यक्रमाच्या यशस्वीतेसाठी 'यहा मोगी' संस्थेचे सर्व पदाधिकारी आणि अंबापूर गावचे पोलीस पाटील श्री.अशोक चौरे यांनी विशेष परिश्रम घेतले. त्यांच्या उत्तम नियोजनामुळे हा कार्यक्रम अत्यंत शिस्तबद्ध आणि उत्साहपूर्ण वातावरणात पार पडला.